പാലക്കാട്‌: ട്രെയിനുകളിലെ വനിതാ കോച്ചുകളില്‍ പുരുഷന്മാര്‍ കയറുന്നതു തടയാനും മുഴുവന്‍സമയ പരിശോധനയ്ക്കും വനിതാ പൊലീസിനെ നിയോഗിക്കും. ആര്‍പിഎഫ് ഉദ്യോഗസ്ഥരുടെ യൂണിഫോമില്‍ ക്യാമറ ഘടിപ്പിക്കാനും തീരുമാനിച്ചു.ഗര്‍ഭിണിയായ യാത്രക്കാരിക്കു നേരെ തമിഴ്‌നാട്ടിലെ കാട്പാടി ഭാഗത്തു വനിതാ കോച്ചിലുണ്ടായ അക്രമത്തിന്റെ പശ്ചാത്തലത്തിലാണു ദക്ഷിണ റെയില്‍വേ സുരക്ഷാ വിഭാഗത്തിന്റെ നടപടി. ട്രെയിനുകളില്‍ പരിശോധന നടത്തുന്ന റെയില്‍വേ സംരക്ഷണ സേന (ആര്‍പിഎഫ്), സംസ്ഥാന റെയില്‍വേ പൊലീസ് (ജിആര്‍പിഎഫ്) സംഘത്തില്‍ വനിതകളുടെ എണ്ണം വര്‍ധിപ്പിക്കും.
പ്രധാന സ്റ്റേഷനുകളിലും ട്രെയിനുകളിലും സിസിടിവി ശൃംഖല സ്ഥാപിക്കാനും റെയില്‍വേ തീരുമാനിച്ചു. പുതുതായി ഇറങ്ങുന്ന എല്‍എച്ച്ബി കോച്ചുകളിലും വന്ദേഭാരതിലുമാണ് ഇപ്പോള്‍ സിസിടിവിയുള്ളത്. ട്രെയിനില്‍ സാക്ഷിയാകുന്ന സംഭവങ്ങള്‍ രേഖപ്പെടുത്താനാണു യൂണിഫോമില്‍ ക്യാമറ ഘടിപ്പിക്കുന്നത്. പരീക്ഷണത്തില്‍ സംവിധാനം പ്രയോജനപ്രദമാണെന്നു തെളിഞ്ഞിട്ടുണ്ട്.