ബെയ്ജിങ്: വിമാനത്തിലെ രണ്ട് യാത്രക്കാരികള്‍ തമ്മിലുള്ള തര്‍ക്കം പരിഹരിക്കാന്‍ ശ്രമിക്കുന്നതിനിടെ വനിതാ ക്രൂ അംഗത്തിന് കടിയേറ്റു. തര്‍ക്കത്തിലേര്‍പ്പെട്ട വനിതകളിലൊരാളാണ് ജീവനക്കാരിയുടെ കയ്യില്‍ കടിച്ചത്. ഷെന്‍ഷെന്‍ എയര്‍ലൈന്‍സ് വിമാനത്തില്‍ ചൊവ്വാഴ്ചയാണ് സംഭവം.
യാത്രക്കാരികള്‍ ഇരുവരും ഒരേ നിരയിലുള്ള, തൊട്ടടുത്ത സീറ്റുകളിലാണ് ഇരുന്നിരുന്നത്. ഇരുവരും തമ്മില്‍ ശരീരഗന്ധത്തെ ചൊല്ലിയാണ് തര്‍ക്കമുണ്ടായത്. ഒരു യാത്രക്കാരി മറ്റേ യാത്രക്കാരിയുടെ ശരീരഗന്ധം അസ്വസ്ഥതയുണ്ടാക്കുന്നതാണെന്ന് പറയുകയായിരുന്നു. ഇതോടെ, പരാതിയുന്നയിച്ച യാത്രക്കാരിയുടെ പെര്‍ഫ്യൂമിന്റെ ഗന്ധം തനിക്കും അസ്വസ്ഥതയുണ്ടാക്കുന്നെന്ന് മറ്റേ യാത്രക്കാരിയും പറഞ്ഞു.
വാക്കുതര്‍ക്കം കയ്യാങ്കളിയിലേക്ക് നീങ്ങിയപ്പോള്‍ ഇവരെ ശാന്തരാക്കാന്‍ മറ്റ് യാത്രക്കാരും ക്രൂ അംഗങ്ങളും ഇടപെട്ടു. ഇതിലൊരു വനിതാ ക്രൂ അംഗത്തിനാണ് യാത്രക്കാരില്‍ ഒരാളുടെ കടിയേറ്റത്. ഇതിന്റെ ദൃശ്യങ്ങള്‍ സാമൂഹികമാധ്യമങ്ങളില്‍ വ്യാപകമായി പ്രചരിക്കുന്നുണ്ട്. സംഭവത്തിന് പിന്നാലെ പോലീസ് എത്തുകയും യാത്രക്കാരികളെ സ്ഥലത്തുനിന്ന് നീക്കംചെയ്യുകയും ചെയ്തു.
ഷെന്‍ഷെന്‍ അന്താരാഷ്ട്ര വിമാനത്താവളത്തില്‍നിന്ന് ഷാങ്ഹായി ഹോങ്ക്വിയാവോ അന്താരാഷ്ട്ര വിമാനത്താവളത്തിലേക്കുള്ള വിമാനത്തിലാണ് സംഭവം നടന്നത്. ഇതേത്തുടര്‍ന്ന് വിമാനം രണ്ടുമണിക്കൂര്‍ വൈകുകയും ചെയ്തു.
Discover more from MALAYALAM
Subscribe to get the latest posts sent to your email.