ന്യൂഡല്‍ഹി: ജസ്റ്റിസ് ബി.ആര്‍. ഗവായ് അടുത്ത സുപ്രീംകോടതി ചീഫ് ജസ്റ്റിസാകും. നിലവിലെ സുപ്രീംകോടതി ചീഫ് ജസ്റ്റിസായ സഞ്ജീവ് ഖന്നയാണ് മുതിര്‍ന്ന ജഡ്ജിയായ ജസ്റ്റിസ് ബി.ആര്‍. ഗവായിയെ അടുത്ത ചീഫ് ജസ്റ്റിസായി നിയമിക്കാൻ കേന്ദ്രസർക്കാരിനോട് ശുപാർശചെയ്തത്.
സുപ്രീംകോടതിയുടെ 52-ാമത് ചീഫ് ജസ്റ്റിസായി ബി.ആര്‍. ഗവായ് മെയ് 14-ന് സത്യപ്രതിജ്ഞ ചെയ്യും. നിലവിലെ ചീഫ് ജസ്റ്റിസായ സഞ്ജീവ് ഖന്ന മെയ് 13-നാണ് വിരമിക്കുന്നത്.
1960 നവംബര്‍ 24-ന് അമരവാതിയിലാണ് ഭൂഷണ്‍ രാമകൃഷ്ണ ഗവായ് എന്ന ബി.ആര്‍. ഗവായിയുടെ ജനനം. 1985 മാര്‍ച്ച് 16-ന് അദ്ദേഹം അഭിഭാഷകനായി എന്‍ റോള്‍ചെയ്തു. മുന്‍ അഡ്വക്കേറ്റ് ജനറലും ഹൈക്കോടതി ജഡ്ജിയുമായിരുന്ന രാജ എസ്. ബോണ്‍സാലെയുടെ കീഴിലായിരുന്നു തുടക്കക്കാലത്ത് ഗവായ് പ്രാക്ടീസ് ചെയ്തിരുന്നത്. 1987 മുതല്‍ 1990 വരെ ബോംബെ ഹൈക്കോടതിയില്‍ സ്വതന്ത്രമായി പ്രാക്ടീസ് ചെയ്തു. 1990-ന് ശേഷം ബോംബെ ഹൈക്കോടതിയുടെ നാഗ്പുര്‍ ബെഞ്ചിലും അദ്ദേഹം പ്രാക്ടീസ് ചെയ്തിരുന്നു.
നാഗ്പുര്‍ മുനിസിപ്പല്‍ കോര്‍പ്പറേഷന്‍, അമരാവതി മുനിസിപ്പല്‍ കോര്‍പ്പറേഷന്‍, അമരാവതി സര്‍വകലാശാല തുടങ്ങിയവയുടെ സ്റ്റാന്‍ഡിങ് കോണ്‍സലായും പ്രവര്‍ത്തിച്ചു. 2003 നവംബര്‍ 14-ന് ഹൈക്കോടതിയിലെ അഡീഷണല്‍ ജഡ്ജിയായി നിയമിതനായി. 2005-ല്‍ ബോംബെ ഹൈക്കോടതിയിലെ സ്ഥിരം ജഡ്ജിയായി. 2019 മെയ് 24-ന് സുപ്രീംകോടതി ജഡ്ജിയായി സ്ഥാനക്കയറ്റം ലഭിച്ചു.
Discover more from MALAYALAM
Subscribe to get the latest posts sent to your email.