കൊച്ചി: കൂത്താട്ടുകുളം നഗരസഭയിലെ വനിതാ കൗണ്‍സിലര്‍ കലാരാജുവിനെ തട്ടിക്കൊണ്ടുപോയ കേസില്‍ പൊലീസിന് വീഴ്ച പറ്റിയെന്ന് റിപ്പോര്‍ട്ട്. പൊലീസുകാര്‍ക്കെതിരേ നടപടിക്ക് ശുപാര്‍ശ ചെയ്ത റിപ്പോര്‍ട്ട് എറണാകുളം എസ്പി എം. കൃഷ്ണന്‍ ജില്ലാ പൊലീസ് മേധാവിക്ക് കൈമാറി. കലാരാജുവിനെ സിപിഎം ഓഫീസിലേക്ക് കൂട്ടിക്കൊണ്ട് പോവുക മാത്രമാണ് ചെയ്തതെന്നും തട്ടിക്കൊണ്ടു പോയിട്ടില്ലെന്നുമായിരുന്നു സിപിഎം നേതാക്കളുടെ വാദം.
പ്രതിപക്ഷമാണ് പൊലീസിന് വീഴ്ച പറ്റിയെന്ന ആരോപണം ഉന്നയിച്ചത്. ജനുവരി 18ന് കലാ രാജുവിനെ സിപിഎം പ്രവര്‍ത്തകര്‍ തട്ടിക്കൊണ്ടു പോയെന്നായിരുന്നു പരാതി. യുഡിഎഫിന് അനുകൂലമായി കലാ രാജു വോട്ട് ചെയ്യുമെന്ന് മനസിലാക്കിയതോടെയാണ് തട്ടിക്കൊണ്ടു പോകല്‍ എന്നായിരുന്നു ആരോപണം.
തുടര്‍ന്ന് അമ്മയെ കാണാനില്ലെന്ന് ചൂണ്ടിക്കാട്ടി മക്കള്‍ പരാതി നല്‍കുകയായിരുന്നു. പിന്നാലെ സിപിഎം കൂത്താട്ടുകുളം ഏരിയാ സെക്രട്ടറി, നഗരസഭാ ചെയര്‍പേഴ്‌സണ്‍, വൈസ് ചെയര്‍മാന്‍, പാര്‍ട്ടി ലോക്കല്‍ സെക്രട്ടറി എന്നിവരടക്കം 45 പേരെ പ്രതിയാക്കി പൊലീസ് കേസെടുക്കുകയും പ്രവര്‍ത്തകരെ അറസ്റ്റ് ചെയ്യുകയും ചെയ്തു.
നഗരസഭയില്‍ അവിശ്വാസ പ്രമേയം ചര്‍ച്ചചെയ്യാനിരിക്കെയാണ് സ്വന്തം കൗണ്‍സിലറെ സിപിഎം തട്ടിക്കൊണ്ടുപോയത്. ഇതിനു പിന്നാലെ കൂത്താട്ടുകുളത്ത് വലിയ രീതിയില്‍ രാഷ്ട്രീയ സംഘര്‍ഷമുണ്ടായിരുന്നു. ഡിവൈഎസ്പിയുടെ നേതൃത്വത്തിലുള്ള പൊലീസ് സംഘം തട്ടിക്കൊണ്ടുപോകലിന് കൂട്ടുനിന്നെന്നായിരുന്നു കോണ്‍ഗ്രസ് നേതാക്കളുടെ ആരോപണം.
Discover more from MALAYALAM
Subscribe to get the latest posts sent to your email.