പത്തനംതിട്ട: സിഐടിയു പ്രവര്‍ത്തകന്‍ ജിതിന്റേത് രാഷ്ട്രീയ കൊലപാതകം തന്നെയാണെന്ന് ആവര്‍ത്തിച്ച് സിപിഎം പത്തനംതിട്ട ജില്ലാ സെക്രട്ടറി രാജു എബ്രഹാം. മൃഗീയമായ കൊലപാതകമാണ് പ്രതികള്‍ നടത്തിയതെന്നും മുമ്പ് പ്രതികള്‍ക്കെതിരേ സിപിഎം ലോക്കല്‍ കമ്മിറ്റിക്ക് സമരം വരെ ചെയ്യേണ്ടി വന്നിട്ടുണ്ടെന്നും രാജു എബ്രഹാം പറഞ്ഞു. കേസില്‍ ഒന്നാം പ്രതിയായ നിഖിലേഷിന് സിപിഎമ്മുമായി ബന്ധമില്ലെന്നും നിഖിലേഷ് അറിയപ്പെടുന്ന ആര്‍എസ്എസ് ക്രിമിനലാണെന്നും രാജു എബ്രഹാം ആരോപിച്ചു.
കേസിലെ പ്രതികളായിരുന്ന രണ്ടുപേര്‍ മുന്‍പ് ആര്‍എസ്എസ് പ്രവര്‍ത്തകരായിരുന്നു. പിന്നീട് 2022ല്‍ ഇവര്‍ ഡിവൈഎഫ്‌ഐയില്‍ ചേര്‍ന്നു. മയക്കുമരുന്ന്, സാമൂഹ്യവിരുദ്ധ പ്രവര്‍ത്തനങ്ങളില്‍ ഏര്‍പ്പെട്ടിരുന്നതിനാല്‍ ഇവരെ പിന്നീട് പരിപാടികള്‍ക്ക് ക്ഷണിച്ചില്ല. ഇതോടെ ഇരുവരും ആര്‍എസ്എസിലേക്ക് മടങ്ങി.
എന്നാല്‍ ഇരുവരും നിരന്തരം പ്രദേശത്തെ ഡിവൈഎഫ്‌ഐക്കെതിരേ വെല്ലുവിളികളും പ്രതിഷേധിക്കുകയും ചെയ്തിരുന്നു. കൊലപാതകത്തില്‍ നിന്ന് ആര്‍എസ്എസിനോ ബിജെപിക്കോ ബിഎംഎസിനോ കൈ കഴുകി രക്ഷപ്പെടാന്‍ സാധിക്കില്ലെന്ന് അദ്ദേഹം മാധ്യമങ്ങളോട് പറഞ്ഞു.
ഞായറാഴ്ച രാത്രിയോടെയായിരുന്നു പെരുനാട് മഠത്തുംമൂഴി കൊച്ചുപാലത്തിന് സമീപത്ത് വച്ചുണ്ടായ സംഘര്‍ഷത്തെ തുടര്‍ന്ന് ജിതിന് കുത്തേറ്റത്. ആശുപത്രിയില്ലെത്തിച്ചെങ്കിലും മരണം സംഭവിക്കുകയായിരുന്നു. ആക്രമണത്തില്‍ മറ്റ് രണ്ട് പേര്‍ക്കും പരുക്കേറ്റിരുന്നു. കൊലപാതകം നടന്ന് 24 മണികൂറിനുള്ളില്‍ കേസിലെ മുഴുവന്‍ പ്രതികളും പൊലീസിന്റെ പിടിയിലായിരുന്നു.
Discover more from MALAYALAM
Subscribe to get the latest posts sent to your email.