ഏറ്റുമാനൂര്‍: തന്റെ നേതൃത്വത്തിലുള്ള കുടിവെള്ള പദ്ധതി പ്രമോട്ട് ചെയ്യാനായി കേന്ദ്രസര്‍ക്കാറിന്റെ അമൃത് ജലവിതരണ പദ്ധതിയില്‍ നിന്നും കണക്ഷന്‍ കൊടുക്കുന്നത് തടഞ്ഞ് ബി ജെ പി പ്രതിനിധി കൂടിയായ നഗരസഭാ കൗണ്‍സിലര്‍. ഏറ്റുമാനൂര്‍ നഗരസഭ 34-ാം വാര്‍ഡില്‍ ശക്തിനഗര്‍ ലെയ്‌നില്‍ കഴിഞ്ഞ ദിവസമാണ് സംഭവം. വിമുക്തഭടന്‍ കൂടിയായ അഭിഭാഷകന്റെ വീട്ടിലേക്കുള്ള കണക്ഷനാണ് കൗണ്‍സിലര്‍ തടഞ്ഞത്. ഇതുസംബന്ധിച്ച് അഭിഭാഷകനും ഇന്ത്യന്‍ എയര്‍ ഫോഴ്‌സ് മുന്‍ ഉദ്യോഗസ്ഥനുമായ തിരുവനന്തപുരം കേശവദാസപുരം ജയസായി ഭവനില്‍ അഡ്വ. കെ.പി. ഓമനകുട്ടന്‍ തദ്ദേശ വകുപ്പ് മന്ത്രിക്കും ഏറ്റുമാനൂര്‍ നഗരസഭാ സെക്രട്ടറിക്കും ഉള്‍പ്പെടെ പരാതി നല്‍കി.
ഓമനകുട്ടന്‍ ഏറ്റുമാനൂര്‍ ശക്തിനഗറിലുള്ള ഓംകാരം എന്ന തന്റെ വസതിയിലേക്ക് കേന്ദ്രസര്‍ക്കാരിന്റെ അമൃത് പദ്ധതി പ്രകാരമുള്ള കുടിവെള്ള കണക്ഷനു വേണ്ടി വാട്ടര്‍ അതോറിറ്റിയില്‍ അപേക്ഷ നല്‍കിയിരുന്നു. ഇതനുസരിച്ച് കണക്ഷന്‍ നല്‍കാനായി വാട്ടര്‍ അതോറിറ്റി ജീവനക്കാര്‍ ഓമനകുട്ടന്റെ വീട്ടില്‍ എത്തി. കണക്ഷന്‍ നല്‍കുന്നതിനായി റോഡിനു കുറുകെ കുഴിയെടുത്ത് പൈപ്പ് പാകുകയും ചെയ്തു. ഈ സമയം പാര്‍ട്ടി പ്രവര്‍ത്തകരെയും കൂട്ടി സ്ഥലത്തെത്തിയ വാര്‍ഡ് കൗണ്‍സിലര്‍ ഉഷാ സുരേഷ് പ്രവൃത്തി തടസപ്പെടുത്തുകയും ബഹളം കൂട്ടി സംഘര്‍ഷാവസ്ഥ സൃഷ്ടിക്കുകയും ചെയ്തു. പാകിയ പൈപ്പുകള്‍ കരാര്‍ പണിക്കാരെ കൊണ്ട് ഊരിയെടുപ്പിക്കുകയും ചെയ്‌തെന്നാണ് പരാതി.
തിരുവനന്തപുരത്തായിരുന്ന തന്നെ ഫോണില്‍ വിളിച്ച് വല്ലാതെ ദേഷ്യപ്പെട്ട കൗണ്‍സിലര്‍ വാട്ടര്‍ അതോറിറ്റി കണക്ഷനുപകരം ഇവരുടെ കൂടി നേതൃത്വത്തിലുള്ള സമിതിയുടെ വക ‘പടിഞ്ഞാറെ നട കുടിവെള്ള പദ്ധതി’യില്‍ നിന്നും കണക്ഷന്‍ എടുക്കണമെന്ന് പറഞ്ഞുവെങ്കിലും താന്‍ സമ്മതിച്ചില്ലെന്ന് ഓമനകുട്ടന്‍ പറയുന്നു. തനിക്ക് അമൃത് പദ്ധതി പ്രകാരം സൗജന്യമായി കണക്ഷന്‍ ലഭിക്കുമെന്ന് അഭിഭാഷകന്‍ പറഞ്ഞതോടെ കൂടുതല്‍ രോഷാകുലയായ കൗണ്‍സിലര്‍ പിന്നീട് ‘താന്‍ പണിത റോഡ്’ തന്റെ അനുവാദമില്ലാതെ വെട്ടി പൊളിച്ചുവെന്ന് പറഞ്ഞായി ബഹളം. ഇതിനിടെ ഇവര്‍ വാട്ടര്‍ അതോറിറ്റിയുടെ വാഹനവും തടഞ്ഞിട്ടു.
സംഘര്‍ഷാവസ്ഥ സംജാതമായതോടെ കണക്ഷന്‍ നല്‍കാനാവാതെ വാട്ടര്‍ അതോറിറ്റി അധികൃതര്‍ മടങ്ങിയെന്നും പ്രശ്‌നം പരിഹരിച്ച് തനിക്ക് കണക്ഷന്‍ നല്‍കാനുള്ള നടപടികള്‍ സ്വീകരിക്കണമെന്നും ഓമനകുട്ടന്‍ പരാതിയില്‍ ആവശ്യപ്പെട്ടു.
മന്ത്രി വി.എന്‍. വാസവന്റെ എം എല്‍ എ ഫണ്ടില്‍ നിന്നും 15 ലക്ഷം രൂപ അനുവദിച്ച് ഒരു വര്‍ഷം മുമ്പ് നവീകരിച്ച റോഡിലാണ് പൈപ്പിടാനായി വാട്ടര്‍ അതോറിറ്റി കുഴിയെടുത്തത്. നഗരസഭയുടെ അനുവാദമില്ലാതെയാണ് വാട്ടര്‍ അതോറിറ്റി റോഡ് കുഴിച്ചതെങ്കില്‍ സെക്രട്ടറിയോ എല്‍എസ്ജിഡി എഞ്ചിനീയറോ ഇടപെട്ട് നോട്ടീസ് നല്‍കി നിയമനടപടികള്‍ സ്വീകരിക്കുന്നതിന് പകരം കൗണ്‍സിലര്‍ അവിടെയെത്തി പ്രവൃത്തി തടസപ്പെടുത്തി ബഹളം കൂട്ടിയതിന്റെ ഉദ്ദേശമെന്തെന്നുള്ള ചോദ്യവും ഉയരുന്നുണ്ട്. അതേസമയം, റോഡ് വെട്ടിപൊളിച്ചതും പൈപ്പിന്റെ ലേഔട്ട് ഉള്‍പ്പെടെയുള്ള കാര്യങ്ങളും തന്റെ അറിവോടെ ആയിരുന്നില്ലെന്നും എങ്കില്‍ പോലും റോഡിന്റെ അറ്റകുറ്റപണികള്‍ നടത്താന്‍ താന്‍ ഒരുക്കമാണെന്നും കൗണ്‍സിലര്‍ ഫോണില്‍ ബന്ധപ്പെട്ടപ്പോള്‍ ഓമനകുട്ടന്‍ പറഞ്ഞിരുന്നു. അതിന് മറുപടി നല്‍കാന്‍ പോലും തയ്യാറാകാതെ പ്രവൃത്തി തടസപ്പെടുത്തി സംഘര്‍ഷാവസ്ഥ സൃഷ്ടിക്കുകയാണ് കൗണ്‍സിലര്‍ ചെയ്തതെന്നും ഓമനകുട്ടന്‍ പരാതിയില്‍ സൂചിപ്പിക്കുന്നു. ഇത്രയുമായിട്ടും വാട്ടര്‍ അതോറിറ്റി കണക്ഷന്‍ നല്‍കിയിട്ടില്ല.
Discover more from MALAYALAM
Subscribe to get the latest posts sent to your email.